Aziýanyň Futbol Konfederasiýasy AFK-nyň Çempionlar ligasy-2-niň 1/8 final oýunlarynyň senesini tassyklady. Türkmenistanyň «Arkadag» toparynyň garşydaşy bäş gezek «Altyn topuň» eýesi Kriştianu Ronaldunyň çykyş edýän Saud Arabystanynyň «Al-Nasr» topary bolar.

Birinji oýun 11-nji fewralda, çarşenbe güni «Arkadag» stadionynda geçiriler. Duşuşyk Aşgabat wagty bilen sagat 18:45-de başlar. Jogap oýny 18-nji fewralda Er-Riyad şäherinde geçiriler we sagat 21:15-de başlar.

Toparçalaýyn tapgyrda «Al-Nasr» D toparçada alty oýunda alty ýeňiş gazanyp, 22:2 tapawutly pökgi bilen ynamly birinji orny eýeledi. «Arkadag» bolsa B toparçada bir ýeňiş, dört deňme-deňlik we bir ýeňiliş bilen ikinji orny eýeledi.

Kriştianu Ronaldudan başga-da, «Al-Nasr» toparynyň düzüminde Sadio Mane, Žoau Feliks, Kingsli Koman we Marselo Brozowiç ýaly belli futbolçylar çykyş edýärler. Topara portugaliýaly tälimçi Žorže Žezuş ýolbaşçylyk edýär.

Iki oýnuň netijesi boýunça ýeňiji bolan topar çärýek finala çykar we ol ýerde «Al-Zawraa» (Yrak) — «Al-Wasl» (BAE) jübütiniň ýeňijisi bilen duşuşar.