Türkmenistan ählumumy ulag başlangyçlarynyň esasy öňe sürijisi hökmündäki ornuny berkitdi. Ýurduň hemişelik Bitaraplygynyň 30 ýyllygynyň öňüsyrasynda BMG-niň Baş Assambleýasy 2026–2035-nji ýyllary «Birleşen Milletler Guramasynyň durnukly ulag boýunça onýyllygy» diýip yglan etmek baradaky taryhy Kararnamany kabul etdi. Bu çözgüt hormatly Prezidentimiz Serdar Berdimuhamedowyň we türkmen halkynyň Milli Lideri Gahryman Arkadagymyzyň sebiti geçelge ýollaryň iri çatrygyna öwürmek baradaky köpýyllyk strategiýasynyň dowamy boldy.

Şu günki günde ulag diňe bir daşama düzümi däl-de, eýsem durnukly ösüşiň güýçli görkezijisidir. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň belleýşi ýaly, Türkmenistanyň BMG derejesindäki başlangyçlary zenanlaryň hukuklaryny giňeltmek we howanyň üýtgemegine garşy durmak ýaly ählumumy wezipeleriň çözülmegi bilen göni baglanyşyklydyr. Dikeldilýän Beýik Ýüpek ýolunyň ýüreginde ýerleşýän Türkmenistan halkara hyzmatdaşlary bilen bilelikde bitewi ulag-aragatnaşyk toruny döredýär.

Täze geçelgeler Merkezi Aziýany Ýewropa, Hazar we Baltika sebitleriniň ýurtlary, şeýle hem Günorta we Günorta-Gündogar Aziýa bilen baglanyşdyryp, «tekerlerde we gämilerde» bökdençsiz söwdany üpjün edýär.

BMG-niň täze Onýyllygy (2026–2035 ýý.) bütin dünýä ykdysadyýeti üçin strategik ýol görkezijisi bolar. Çaklamalara görä, 2030-njy ýyla çenli ulag pudagyna goýuljak maýa goýumlarynyň möçberi 11 trillion dollardan geçer.

Esasy üns ekologiýa arassalygyna, howpsuzlyga we emeli aňyň ornaşdyrylmagyna gönükdiriler. Türkmenistan eýýäm bu özgerişleriň binýadyny tutdy: Aşgabatda Durnukly ulag boýunça ilkinji ählumumy maslahatyň geçirilmeginden başlap, Bütindünýä welosiped gününiň döredilmegine çenli uly işler bitirildi.

Ýurduň häzirki başlangyçlary döwrebap tehnologiýalaryň her bir adamyň bähbidine hyzmat edýän «ýaşyl» we biri-biri bilen baglanyşykly dünýäsini döretmek üçin ygtybarly hukuk binýadyny kemala getirýär.