Täze ýylyň öňüsyrasynda Senagatçylar we telekeçiler halkara uniwersiteti Aşgabat we Arkadag şäheriniň orta mekdepleriniň 12-nji synp okuwçylarynyň arasynda «Bitaraplyk — dillerimiziň senasy» atly iňlis dili bäsleşigini gurady.

Bu zehin bäsleşigine iňlis dili çuňlaşdyrylyp öwredilýän 67 sany umumy bilim berýän we ýöriteleşdirilen mekdeplerden 200-e golaý ýokary synp okuwçysy gatnaşdy. Gatnaşyjylar dil taýýarlygynyň ýokary derejesini, iňlis dilini erkin bilýändiklerini, şeýle hem döredijilik ukyplaryny we daşary ýurt dillerini öwrenmäge bolan gyzyklanmalaryny görkezdiler.

Bäsleşigiň netijeleri boýunça I, II we III orunlary eýelän ýeňijiler we baýrakly orunlara mynasyp bolanlar kesgitlendi. Iň gowy netije görkezen okuwçylar degişli derejeli diplomlar we ýadygärlik sowgatlary bilen sylaglandylar.

Bäsleşigiň geçirilmegi bilim ulgamyndaky döwlet maksatnamalaryny durmuşa geçirmäge, milli ylym-bilim ulgamyny ösdürmäge, zehinli ýaşlary goldamaga, şeýle hem daşary ýurt dillerini okatmagy halkara ülňülere laýyklykda kämilleşdirmäge gönükdirilendir.