Arkadag şäheriniň häkimliginde 2026-njy ýylyň "Garaşsyz, baky Bitarap Türkmenistan — bedew batly at-myradyň mekany" diýen şygaryna hem-de onuň jemgyýetçilik-syýasy we medeni ähmiýetine bagyşlanan dabaraly aýdym-sazly çäre geçirildi.

Çärä Arkadag şäheriniň ýolbaçylary, atçylyk pudagynyň wekilleri, Aba Annaýew adyndaky Halkara atçylyk akademiýasynyň mugallymlary we hünärmenleri, hormatly ýaşulular, medeniýet işgärleri, jemgyýetçilik guramalarynyň, köpçülikleýin habar beriş serişdeleriniň wekilleri we talyp ýaşlar gatnaşdylar.

Häkimligiň eýwanynda Arkadag şäheriniň gazananlaryny we ahalteke bedewleriniň gözelligini wasp edýän şekillendiriş we amaly-haşam sungatynyň eserlerinden, halylardan, zergärçilik önümlerinden we fotosuratlardan ybarat sergi guraldy. Türkmen halkynyň Milli Lideri, Gahryman Arkadagymyz Gurbanguly Berdimuhamedowyň ahalteke bedewlerine bagyşlanan kitaplary sergide aýratyn orun aldy.

Çäräniň dowamynda geçirilen maslahatda Türkmen halkynyň Milli Liderine we Türkmenistanyň Prezidenti Serdar Berdimuhamedowa Täze ýyl we 2026-njy ýylyň şygarynyň yglan edilmegi mynasybetli gutlaglar aýdyldy. Çykyş edenler her ýyly bir şygar astynda geçirmek däbininiň ýurduň ösüşiniň strategik ugurlaryny açyp görkezýändigini we jemgyýetiň watansöýüjilik ruhuny berkitmäge ýardam edýändigini nygtadylar.

Täze ýylyň şygarynda milli guwanjymyz we Garaşsyz Türkmenistanyň esasy nyşanlarynyň biri bolan ahalteke bedewi bilen baglanyşykly nyşana aýratyn üns berildi. Gündogar senenamasyna görä 2026-njy ýylyň "At ýyly" boljakdygyny nazarda tutanyňda, bu ýylyň "ganatlanan bedewleriň ýyly" diýlip yglan edilmeginiň çuňňur manysynyň bardygy bellenildi.

Çykyş edenler Türkmenistanyň hemişelik Bitaraplygynyň 30 ýyllygynyň ähmiýetini ýatladyp, ýurduň parahatçylygy, ynanyşmagy we durnuklylygy berkitmekdäki ornuny nygtadylar. Şeýle hem Arkadag şäherinde Aba Annaýew adyndaky Halkara atçylyk akademiýasynyň açylmagynyň we "Galkynyş" milli at üstündäki oýunlar toparynyň halkara üstünlikleriniň ähmiýeti bellenilip geçildi.