2025-nji ýylda S.A. Nyýazow adyndaky Türkmen oba hojalyk uniwersitetiniň weterinar fakultetiniň mugallymlary we talyplary üçin BMG-niň Azyk we oba hojalyk guramasy (FAO) tarapyndan durmuşa geçirilýän LEAP ("Maldarçylygyň ekologiýa görkezijilerine baha bermek we gowulandyrmak boýunça hyzmatdaşlyk") maksatnamasy boýunça sanly ulgam arkaly okuw maslahatlary guraldy. Maksatnama maldarçylygyň ekologiýa täsirlerine baha bermäge we milli däp-dessurlary nazarda tutup, durnukly çözgütleri tapmaga gönükdirilendir.

Okuwyň jemleýji tapgyry hökmünde Türkmenistanyň Oba hojalyk ministrliginiň goldawy bilen diňleýjileriň halkara bilermenler bilen duşuşygy geçirildi. Maslahata Italiýadan, Hytaýdan, Ukrainadan we Türkiýeden gelen hünärmenler gatnaşdylar.

Duşuşyga gatnaşyjylar LEAP başlangyjynyň Merkezi Aziýa ýurtlarynda işjeň ilerledilýändigini we durnukly tebigatdan peýdalanmagy hem-de "ekoulgam hyzmatlaryny" — maldarçylygyň daşky gurşaw üçin peýdaly täsirlerini ösdürmäge gönükdirilendigini bellediler. Olaryň hatarynda azyk önümçiligi, haýwanlaryň milli tohumlaryny gorap saklamak, adaty aryçylygy ösdürmek, şeýle hem topragyň we öri meýdanlarynyň ýagdaýyny gowulandyrmak üçin organiki galyndylary kompost we biogumus hökmünde gaýtadan işlemek bar.

Weterinar howpsuzlygy meselelerine aýratyn üns berildi. Döwlet weterinariýa gullugynyň Merkezi barlaghanasynda birnäçe keselleriň garşysyna sanjymlaryň öndürilýändigi, şeýle hem ýurduň sebitleri boýunça oba hojalyk haýwanlaryny sanjym etmegiň her ýyllyk meýilnamalarynyň durmuşa geçirilýändigi habar berildi.

Duşuşygyň dowamynda öri meýdanlaryny dikeltmek boýunça ylmy işläp taýýarlamalar, şol sanda şorluk ýerlerde duza çydamly iýmlik ösümlikleri ekmek meseleleri maslahatlaşyldy. Ekologiýa we ylmy edaralaryň wekilleri tebigy serişdeleri dolandyrmaga toplumlaýyn çemeleşmegiň möhümdigini nygtadylar, munda maldarçylyk, ekerançylyk we daşky gurşawy goramak durnukly ösüşiň özara baglanyşykly görkezijileri hökmünde garalýar.