Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň resmi web-saýty işläp başlady. Bu web-saýtyň işe girizilmegi Gaznanyň işini ösdürmekde nobatdaky ädim boldy we ol amala aşyrylýan ynsanperwer başlangyçlar baradaky maglumatlaryň açyklygyny hem-de elýeterliligini ýokarlandyrmaga gönükdirilendir.

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy 2021-nji ýylda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlangyjy bilen döredildi. Döredilen pursadyndan başlap, Gazna aýratyn alada, lukmançylyk kömegine we durmuş goraglylygyna mätäç çagalary goldamak boýunça ulgamlaýyn işleri amala aşyrýar.

Çagalaryň saglygyny goramak, olaryň hemmetaraplaýyn ösmegine ýardam etmek, bilimi goldamak, şeýle hem ynsanperwer kömegini bermek Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işiniň esasy ugurlarydyr. Saglyk mümkinçilikleri çäkli, ene-ata tarapyndan howandarlyga mätäç bolan we durmuşyň agyr ýagdaýlaryna düşen çagalara aýratyn üns berilýär. Gaznanyň işi milli we halkara derejeli ynsanperwer taslamalary öz içine alýar.

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň resmi web-saýty döwrebap maglumat platformasy bolup, onda Gaznanyň wezipeleri we ileri tutulýan ugurlary, amala aşyrylýan maksatnamalar, haýyr-sahawat çäreleri we gazanylan netijeler baradaky maglumatlar ýerleşdirilendir. Ulanyjylar täzelikler, edilen işler baradaky hasabatlar we möhüm başlangyçlar bilen tanyşyp bilerler. Web-saýt jemgyýetimiz üçin amatly bolup, üç dilde — türkmen, rus we iňlis dillerinde işleýär.

Web-saýtyň işe girizilmegi jemgyýetçilik, hyzmatdaşlar we halkara guramalar bilen özara gatnaşyklaryň netijeli guralyna öwrülmäge, şeýle hem çagalygy goramak çäklerinde haýyr-sahawat işleriniň mundan beýläk-de ösdürilmegine ýardam etmäge gönükdirilendir.